TEKS PRANATACARA (1)

Assalaamu’alaikum warahmatullaahi wabarakaatuhu, 

Bismillahirrahmanirrahiim, Alhamdulillahirabbil ‘alamiin, Washolaatu wassalaamu ‘alaa sayyidinaa wamawlanaa muhammadin wa a’laa alihi washahbihi ajma’iin.

Para pinisepuh saha para sesepuh ingkang satuhu kinabekten rahimakumullah;

Para alim, ulama, saha para kyai ingkang satuhu lebda ing pitutur, pomo ing pamawas ingkang tansah tinuladha dening para ummat, langkung-langkung wabil khusus dhumateng panjenenganipun almukarrom Bapa Kyai Haji Maskuri ingkang tansah kita antu-antu wedharing wursita aji,maidhah hasanahipun, rahimakumullah.

Kepala Desa Pancuranmas, Bp. Budi Prayitno, ST dalah sedaya jajaranipun. Imam Musholla Al Hidayah Bapak Masrukhin, ingkang kawula mulyakaken, Bapak Kepala Dusun Bojong, Bapak RT, Bapak RW, para tokoh masyarakat ingkang boten saged kawula sebat setunggal-setunggal ingkang kawula hurmati.

Para bapak sumrambah para ibu, sedherek sedaya kaum muslimin walmuslimat rakhimakumullah. Langkung rumiyin sumangga kula dherekaken sami manengku puja puji, ngonjukaken raos syukur dhumateng ngarsanipun Allah SWT ingkang dumugi titiwanci punika taksih kepareng paring nugraha kawilujengan dhumateng panjenengan sedaya dalasan kula, saha awit paringipun sak sae-saenipun ni’mat arupi iman lan Islam.

Shalawat saha salam mugi tansah katetepna dhumateng junjungan kita nabi agung Muhammad SAW, para keluarganipun saha para sahabatipun, saengga benjang ing yaumul akhir mugi-mugi kita tansah pikantuk syafaatipun.

Para rawuh ingkang minulya, keparenga langkung rumiyin kula minangka jejering pambiwara ingkang kapiji nderekaken titi laksananing adicara Pengaosan Walimatus Safar nyuwun lumunturing sih samodra pangaksami, denea kula cumantaka nggempil kamardikan saha munggel pangandikan sawetawis, kinarya amurwakani adicara pengaosan ing siang dinten punika. Saklajengipun keparenga kula badhe hangaturaken menggah urut reroncening adicara ingkang sampun rinacik saha rinantam mekaten :

 Adicara angka sepisan Pambuka,  Kalejengaken adicara angka kalih woasan kalamullah ingkang sampun sinerat ing Pustaka suci al-qur’an, ingkang samangke badhe kasarirani dening ......

Ndungkap adicara ingkang angka tiga Birrul Walidain ingkang sakmangke badhe kaasta dening panjenenganipun .......  Wondene adicara ingkang angka sekawan atur pambagyaharja ingkang hamengku gati.  Adicara saklajengipun minangka wigatosing pepanggihan dalu punika, wedharing pengaosan arupi mauidhoh hasanah ingkang badhe kaasto dening ........... Minangka pungkasaning titi laksana pengaosan nun inggih panutup.

Paripurna waosan ayat-ayat suci ingkang sampun kaaturaken. Ing pangajab mugi dhumateng panjenenganipun ingkang sampun ngaturaken waosan pikantuk ganjaran saking ngarsanipun Allah SWT, sumrambah dumateng kita sedaya kanthi waosan kala wau manah kita langkung tinarbuka saengga saged ayom ayem tentrem. Amiin

Saklajengipun atur pambagya harja shahibul hajat ingkang badhe kasarirani dening panjenenganipun Bapa Nurfai wekdal kawula aturaken sumangga.

Mekaten atur pambagya harja sampun kaaturaken, sakderengipun tumapak adicara saklajengipun, keparengo kawula ngaturaken kurmat dumateng para rawuh sedaya bilih panjenengan sedaya sampun sawetawis anggenipun pinarak, mila punika adicara kita sigeg sawetawis. Dumateng para kadang panitia wekdal kawula aturaken sakcekapipun. Sumangga.

Nuwun agunging pangapunten, bilih wekdal sampun sawetawis dalu keparenga kawula hangaturaken adicara saklajengipun, minangka sari lan wigatosing pepanggihan ing dalu punika kasuwun dumateng pangarsanipun Almukarom Bapa Kyai Maskuri kasuwun paring mauidhah hasanah saha wedharing tausiyah.

Anamung sakdererngipun kula ingkang piniji dherekaken lampahing adicara pinanggih atur ingkang kirang nuju prana saha tindak tanduk ingkang kirang nengsemaken, kanthi andhap asoring manah, nyuwun lumebering samudra pangaksami, kawula akhiri

Wassalamualaikum warrahmatullahi wabarakatuh.